Ang masasamang epekto ng Globalisasyon ay patuloy na nananalanta sa sambayanang Pilipino. Kung mayroon mang biyayang natatamo, hindi ang mas malawak na mga sektor ang nakikinabang kundi ang mga negosyong nakasandig sa mga kompanyang hawak ng mga dayuhang mamumuhunan.

Ito ay nakikita natin ngayon sa malawakang tanggalan ng mga manggagawa dahil sa pagsasara (closure) o parereorganisa at pagsasanib (restructuring and merger) upang lumiit ang operasyon ng mga kompanya at pabrika. Ginagawang batayan ang mas mababang pasahod sa ibang bansa kaya’t lumilipat doon ang mga empresa. Dito, malinaw ang pagkilos ng sistemang kapitalismo kung saan uhaw at pagkagahaman ng kapitalista sa tubo at kapangyarihang pampulitika ang namamayani. Ito ang pundasyon ng globalisasyon. Ito ang dahilan kung kaya’t may digmaan at terorismo. Kayang-kayang isakripisyo ang kapakanan ng mga manggagawa at ng kanilang pamilya.

Ang ganitong kaayusan ay gumagapang din sa ibang mga sektor. Sa kabila na ang Pilipinas ay isang bansang agrikultural, ang industria ng agrikultura ay namamatay dahil sa pagbababa ng presyo ng gulay, karne at iba pang produktong agrikultural nang tanggalin ang taripa ng mga produktong ito. Pinalalala pa ito ng di makontrol na smuggling. Kayat kalakip ng kamatayang ito ang pagkamatay ng mga magsasaka at mangingisda dahil sa gutom at kahirapan, o dili kaya sa militarisasyon ng kanayunan kapag ipinagtatanggol nila ang kanilang mga karapatan.

Dahil sa pagkakasalanta sa mga haliging ito ng ekonomiya-ang mga manggagawa at mga magsasaka, di maikukubli ang lumalawak na kahirapan ng ating mga mamamayan sa kabila ng mga “poverty alleviation programs” at mga “safety nets” ng gobyerno na ginugugulan ng bilyun-bilyong piso.

Ang Federation of Free Workers ay nagsisikap na baguhin ang kanyang sarili, mula sa isang tradisyonal na pag-uunyon na tumutugon lamang sa mga usaping pamplanta at pabrika, tungo sa isang kilusang panlipunan na tutugon din sa mga usapin ng iba pang mga sektor: magsasaka at mangingisda, kababaihan, kabataan, katandaan at mga bata, OFWs at mga nasa Informal sector at mga komunidad. Lahat tayo ay mga manggagawa na may dignidad at karapatan. Sa ngayon, ang FFW ay kumikilos sa pag-oorganisa at pakiki-ugnay sa iba’t ibang sektor.

Ang FFW ay patuloy sa paghahain sa pamahalaan ng mga panukalang pagbabago sa mga batas at sistema upang higit na mapaunlad ang kalagayan ng mga manggagawa at ng mga sektor. Lalahok din sa party-list election ang FFW upang magkaroon ng tinig ang mga sektor sa Kongreso.

Ang FFW ay nakikiisa at katulong ng mga iba pang mga pederasyon sa Rehiyon ng Asya at sa Pandaigdigan, sa pagtuligsa sa masasamang epekto ng Globalisasyon. Kinikilala ng FFW na ang pagharap sa hamon ng Globalisasyon ay nangangailangan ng pandaidigang patugon.

Sa pamamagitan ng pagpapatatag ng pagkakaisa ng unyon at mga sektor, higit nating maigigiit ang ating mga panawagan:

1. Ipagtanggol ang kabuhayan: trabaho, makatuwirang sahod at mga benepisyo. Tigilan ang di-makatarungang kontraktwalisasyon.
2. Ipaglaban ang karapatan sa pag-uunyon at pag-oorganisa, ibalik ang mga tinanggal sa trabaho dahil sa pag-uunyon, itigil ang harassment
3. Pabilisin ang pagdesisyon sa mga kasong sangkot ang mga manggagawa.
4. Gawing Unfair Labor Practice ang paglabag sa Collective Bargaining Agreement
5. Ipatupad ang tunay na reporma sa lupang pansakahan at sa kalunsuran para sa disenteng paninirahan.
6. Rebisahin ang mga patakarang ipinapatupad ng Pilipinas tungkol sa globalisasyon at labanan ang mga masamang epekto nito.
7. Ipasà ang mga panukalang batas na naglalayong wakasan ang child labor.

MABUHAY ANG MALAYANG MANGGAGAWA!!!
MABUHAY ANG SAMBAYANANG PILIPINO!!!

Araw ng Paggawa, Mayo 1, 20

Back to NEWSROOM page