Malayo pa ang Gloria sa mga
Manggagawa at Sambayanan

Sa pagbubukas ng Kongreso sa Hulyo 22, ipapahayag ng Pangulong Gloria Macapagal-Arroyo ang ikalawang State of the Nation Address o SONA sa kanyang panunungkulan. Ang Federation of Free Workers ay hindi nananawagan sa pagpapatalsik sa Pangulong GMA, kundi nakikiisa sa sambayanang Pilipino sa pagsusuri kung natupad ng Pangulong GMA ang kanyang mga pangako noong nakaraang SONA, at ipahayag -- bilang bahagi ng sektor ng paggawa -- ang kanyang karaingan at pananaw tungkol sa kalagayan ng ating bansa.

Sa larangan ng ekonomiya, ipinangako ng Pangulo na pauunlarin niya ang kabuhayan sa pamamagitan ng pamamahagi ng libo-libong bahay sa mahihirap, libo-libong ektarya ng lupa sa mga magsasaka, at libo-libong trabaho para sa mga mamamayan. Tiyak na sasabihin niyang ito ay natupad.

Subalit ang lahat ng ito ay pinabubulaanan ng mga surveys mula sa Social Weather Stations, Pulse Asia at ng Ibon Databank Foundation. Patuloy ang pagtaas ng halaga ng bilihin, kuryente, tubig, gamot at hospitalisasyon, tuition fee at mga buwis. Ang pagprotesta ng mga mamamayan sa Purchased Power Adjustment o PPA ay nagbulgar sa maanomalyang mga transaksyon ng gobyerno na ngayon ay bumibiktima sa sambayanan. Dahil sa ito ay di-makatarungan, dapat lamang na ito ay ibasura.

Higit sa lahat, bagama't kitang-kita na ang masamang epekto ng Globalisasyon sa ekonomiya at mamamayan, patuloy pa rin ang pamahalang GMA sa tahasang pagsuporta sa mga patakaran nito samantalang ang mga ipinangangalandakang "safety nets" ay wala palang kabuluhan. Ang karanasan ng FFW sa National Steel Corporation, Jardine Davies, Goya, Reynolds, at iba pang kompanya ay nagpapatunay na ang globalisasyon ay pabor lamang sa pangunahing interes ng mga kapitalista at mga dayuhan.

Sa larangan ng pulitika, gagawin daw mas epektibo ang paglilingkod ng gobyerno, aalisin ang graft and corruption, ititigil ang kidnapping, illegal gambling, illegal drugs at shabu at isusulong ang bagong pulitika. Tiyak na sasabihin din niyang ito ay natupad.

Kamakailan lamang ay nasaksihan natin na ang mga pangakong ito ay napako. Ang Ambassador mismo ng Amerika ang nagsabi ng talamak ang graft and corruption bagamat matagal na nating sinasabi ito. Maliban sa kaso ng dating Pangulong Joseph Estrada na napatalsik ng sambayanan, wala pang malalaking isda na nakulong dahil sa graft and corruption. Ilang kaso ng mga manggagawa at mga unyon ang nakabinbin sa Korte Suprema, Court of Appeals at NLRC dahil sa mabagal na proseso. Patuloy ang kidnapping, panghohold-up at mga ilegal na gawain sa kabila ng palabas na rigodon ng mga matatas na opisyales ng militar at kapulisan. Nakaka-alarma ang pagtaas ng bilang ng mga pinatay na mga lider mamamayan sa mga kanayunan at iba pang pag-labag sa karapatang pantao. Ang kanyang pagbibigay pabor sa pinagkakautangang-loob sa EDSA 2 at ang pakikisayaw sa mga political butterflies ay nagpapakita na siya ay bahagi pa rin ng bulok at lumang sistemang pulitikal.

Ang Federation of Free Workers ay naniniwala at nagsisikap na itatag ang isang ekonomiyang mayroong makatarungan, maayos, at responsableng pagmamay-ari, pamamahala, pamamahagi at paggamit ng mga sangkap ng produksyon. Naniniwala rin ito sa pulitikang may paggalang sa kalayaan at karapatang pantao, may pakikibahagi ng lahat ng sektor sa pamamahala, malayang kilusang paggawa at sa matapat, marangal na pamamahala, at may mga institusyong nagtataguyod sa katarungan at kapayapaan, kaunlaran at kasaganaan, kalayaan at demokrasya (FFW Constitution, Art. VII, Sec. 17 a at b)

Ang Federation of Free Workers ay patuloy na sumusuporta sa mga ginagawa ng pamahalaan upang marating ang magandang bukas para sa ating bayan. Sa kasamaang palad, malayo pa ang gloria para sa mga manggagawa at sambayanan pagkatapos ng ng isang taon at kalahating pamamahala ni Pangulong GMA.

Sa pagbubukas ng Kongreso, nais din ng FFW na ihain ang kaniyang Legislative Agenda:

Ibasura ang kontra-manggagawa at kontra-mamamayang PPA

Isabatas ang mga panukalang magpapalakas sa pag-uunyon. Alisin ang burukratismo sa pagpaparehistro ng mga unyon at CBA

Ipaglaban ang Living Wage, Job Security, Social Insurance at Social Protection Schemes

Wakasan ang karahasan at pagsasamantala sa mga kababaihan at bata sa lahat ng uri ng paggawa. Pagtibayin ang Magna Carta on Child Labor

Ipagtanggol ang karapatan sa paggawa at mga karapatang pantao

Federation of Free Workers
July 22, 2002

Back to NEWSROOM page